ترجمان دفتر خارجہ ڈاکٹر محمد فیصل نے پاکستان کی جانب سے کرتار پور راہداری پر مذاکرات کی دعوت پر بھارت کے ردعمل کو بچگانہ قرار دیتے ہوئے کہا کہ پاکستان کاجواب سنجیدہ ہوگا

دفتر خارجہ کی ہفتہ وار پریس بریفنگ کے دوران ڈاکٹر محمد فیصل نے کہا کہ بھارت کو امن کے جواب میں امن اور گولی کے بدلے گولی سے جواب دیں گے ڈاکٹر محمد فیصل نے کہاکہ کرتارپور راہداری کھولنے کے لیے 21جنوری کوبھیجے گئے مسودے میں بھارت کو جامع پلان بھیجا اور وفد بھیجنے کا کہا جس پر بھارت نے جواب میں پاکستانی وفد بھیجنے کے لیے 2 تاریخوں کا تعین کردیابھارت کا رویہ بچگانہ ہے

چند روز قبل وزارت خارجہ سے جاری اعلامیے میں کہا گیا تھا کہ نومبر 2019 میں باباگرونانک کے 550 ویں سال گرہ کے موقع پر کرتارپور راہداری کو کھولنے کے وزیراعظم عمران خان کے وعدے کی روشنی میں حکومت پاکستان نے معاہدے کا مسودہ اسلام آباد میں قائم بھارتی ہائی کمیشن کے ذریعے پہنچایا ہے

دفتر خارجہ کے مطابق حکومت پاکستان نے کرتارپور معاہدے کے مسودے کے حوالے سے جنوبی ایشیا اور سارک کے ڈائریکٹر جنرل کو اپنا فوکل پرسن مقرر کر دیا ہے اور بھارتی حکومت سے بھی اس معاملے پر اپنا فوکل پرسن مقرر کرنے کی درخواست کی ہے

اعلامیے میں کہا گیا تھا کہ حکومت پاکستان نے بھارتی حکومت کو معاہدے کو حتمی شکل دینے کے لیے ایک وفد کو ہنگامی بنیادوں پر اسلام آباد بھیجنے کی دعوت دی ہےجس پر بھارت نے پاکستان کے اقدام کا جواب دینے کی بجائے کرتار پور معاہدے کو حتمی شکل دینے کے لیے پاکستانی وفد کو نئی دہلی آنے کی دعوت دی اور ملاقات کے لیے 26 فروری اور 7 مارچ کی تاریخوں کی تجویز بھی دی ترجمان دفتر خارجہ نے بریفنگ کے دوران ملک میں داعش کی موجودگی سے متعلق سوال پر کہا کہ پاکستان میں داعش کا کوئی وجود نہیں

ڈاکٹر محمد فیصل نے بریفنگ کے دوران یہ بھی واضح کیا کہ اسرائیل سے متعلق پاکستان کی پالیسی میں کوئی تبدیلی نہیں آئی ایک سوال کے جواب میں ڈاکٹر محمد فیصل نے اس بات کی ایک مرتبہ پھر نشاندہی کی آسیہ بی بی کے بیرون ملک سفر پر کوئی پابندی عائد نہیں افغانستان امن عمل سے متعلق سوال پر ترجمان دفتر خارجہ نے کہا کہ افغانستان میں امن کے لیے پاکستان اور قطر ضروری مدد فراہم کررہے ہیں انہوں نے کہا کہ دوحہ میں پاکستان نے افغان طالبان اور امریکا کے درمیان جاری بات چیت میں سہولت فراہم کی ہے۔

ڈاکٹر محمد فیصل نے کہا کہ افغانستان میں امن سے متعلق پاکستان کا موقف یہی رہا ہے کہ افغانستان اورپورے خطے میں امن و استحکام کے سیاسی مذاکرات کے ذریعے ممکن ہے۔